Հեղինակ՝ Էրիխ Ռասպե
«Բարոն Մյունխհաուզենի» արկածները գրքից
ԿԵ Ս Ձ Ի Ն
Պատերազմում, իհարկե, իմ քաջությամբ աչքի ընկա և թշնամու վրա հարձակվելիս ամենից առաջ ես էի գնում:
Մի անգամ տաճիկների հետ կատաղի կռիվ ունենալուց հետո, մենք գրավեցինք թշնամու բերդը: Ես առաջինը մտա այդ բերդը և, դուրս քաշելով բոլոր տաճիկներին, փրփրած ձիս քշեցի դեպի աղբյուրը՝ ջուր տալու: Ձին ջուրը խմում էր և ոչ մի կերպ չէր կարողանում իր ծարավը հագեցնել: Անցավ մի քանի ժամ, բայց ձին աղբյուրից չի կտրվում: Սա ի՞նչ հրաշք է: Ես ապշեցի: Բայց հանկարծ իմ հետևից ջրի արտասովոր ձայն լսեցի:
Ես նայեցի և զարմանքից քիչ մնաց, որ ձիուց ընկնեմ:
Բանից դուրս եկավ, որ ձիուս հետևի մասը կտրված է և ջուրը, որ խմում էր, ազատ կերպով ետևից թափվում է՝ փորումը չի մնում: Այդ պատճառով ետևիս մի մեծ լիճ էր գոյացել:
Ես ապշեցի: Ինչ տարօրինակ բան է:
Բայց այդ ժամանակ զինվորներիցս մեկը մոտեցավ ինձ և հանելուկը պարզեց:
Երբ ես հետևելիս եմ եղել թշնամիներին և բերդն եմ մտել, տաճիկները հենց այդ վայրկյանին բերդի դուռը փակել են և ձիուս կեսը կտրել: Կարծես կես են արել: Ետևի մասը միաժամանակ մնացել է դարպասի մոտ, աքացիներով ցրել տաճիկներին, հետո վազել մոտիկ դաշտը:
-Նա այնտեղ արածում է, — հայտնեց զինվորս:
-Արածում է: Չի կարող պատահել:
-Ինքներդ տեսեք:
Ես, ձիուս առաջին կեսի վրա նստած, սլացա դեպի դաշտը: Այնտեղ ես իսկապես տեսա ձիուս երկրորդ մասը: Նա կանաչ դաշտում հանգիստ արածում էր:
Ուղարկեցի զինվորական բժշկի ետևից և նա, երկար չմտածելով, դափնու բարակ ճյուղերով ձիուս կեսերը կարեց իրար, որովհետև թել չուներ:
Ձիուս կեսերը կպան իրար, իսկ դափնու ճյուղերը նրա մարմնի մեջ արմատներ արձակեցին և մի ամսից հետո թամքի վրա դափնու ճյուղերից մի լավ տաղավար ունեցա:
Այդ տաղավարի մեջ նստած, ես շատ զարմանալի քաջագործություններ կատարեցի:
Հարցեր և առաջադրանքներ
- Դու՛րս գրիր անծանոթ բառերն ու օնլայն բառարանի օգնությամբ բացատրի՛ր։
Տաճիկներ-Թուրքեր,
Բերդ-Անառիկ՝ անմատչելի տեղ, Ամրոց,
Ապշել- Սաստիկ զարմանալ, ապուշանալ, հիանալ,
Աքացի-Ոտքի հարված, քացի,
Արածել- Դալար խոտը ուտել, բույսերով սնվել,
Դափնի- մշտադալար թուփ կամ ծառ՝ անուշահոտ տերևներով,
Թամք-Թամբ -Ձիու՝ Էշի՝ ջորու մեջքին դրվող նստելու հարմարանք հեծյալի համար,
Տաղավար- Այգիներում՝ զբոսայգիներում ժամանակավոր թեթև շինություն՝ խաղերի, հանգստի, առևտրի համար:
- Գտիր գոյականներ, որոնցից կարող ես բայեր ստանալ,
օրինակ՝ նկար-նկարել, խոսք-խոսել…
Պատերազմ-պատերազմել, թշնամի-թշնամանալ, կես-կիսել, կռիվ-կռվել,
ջուր-ջրել, ծարավ-ծարավել, բժիշկ-բժշկել, թամբ-թամբել, թել-թելել
- Գունավոր ընդարձակ նախադասությունները դարձրո՛ւ համառոտ, համառոտները՝ ընդարձակ:
Ես ապշեցի երբ տեսա սարդ մարդուն:
Այնտեղ ես իսկապես տեսա ձիուս երկրորդ մասը: Ես տեսա:
Նա կանաչ դաշտում հանգիստ արածում էր: Նա արածում էր:
Տրված բառակապակցություններն գրի՛ր մեկ բառով:
Օրինակ՝ կարուձև անող արհեստավոր-դերձակ
Ձիերի խումբ – երամակ
Որս անող մարդ – որսորդ
Բույսով կերակրվող – բուսակեր
Ձիու ձագ – քուռակ
Հրաման տալ – հրամայել
Կենդանիներ բուժող մարդ – անասնաբույժ
Տարոն Կիրակոսյանի բլոգ 